தமிழகத்தைச் சேர்ந்த எல்லைப் பாதுகாப்புப் படை வீரர் காளிராஜ்அபுதாபியில் இருக்கும் தன் நண்பர் மூலம் டெல்லியில் பாலியல் தொழிலுக்குக் கட்டாயப்படுத்தப்பட்ட சிறுமியைப் பற்றி அறிந்து அவரை மீட்டுள்ளார்.

விருதுநகர் மாவட்டத்தில் சிவகாசி அருகே உள்ள நாகலாபுரத்தைச் சேர்ந்தவர் நாகராஜ். இவர் அபுதாபியில் கலீபா நகரில் தனியார் நிறுவனம் ஒன்றில் சிசிடிவி ஆபரேட்டராக வேலை பார்க்கிறார். கடந்த திங்கட்கிழமை இவருடன் வேலை பார்க்கும் தென் ஆப்பிரிக்காவைச் சேர்ந்த வாஹிதா என்ற பெண் சோகமாக இருந்ததைப் பார்த்து அவரிடம் பேச்சு கொடுத்துள்ளார்.
அப்போது அந்தப் பெண் தனது உடன்பிறந்த சகோதரியை சிலர் வேலை வாங்கித்தருவதாகக் கூறி இந்தியாவுக்கு அழைத்துச் சென்று தலைநகர் டெல்லியில் பாலியல் தொழிலில் ஈடுபடுத்த முயல்வதாகக் கூறியுள்ளார். 17 வயதான அவரது தங்கையைக் காப்பாற்ற நாகராஜ் முயற்சி எடுத்துள்ளார். இதற்காக இந்தியாவில் இருக்கும் தனது நண்பர் காளிராஜை தொடர்புகொண்டு பேசியுள்ளார்.

திருநெல்வேலி மாவட்டம் சங்கரன்கோவிலைச் சேர்ந்த காளிராஜ் பள்ளிப்படிப்பை முடித்துவிட்டு கடந்த 2008ஆம் ஆண்டு இந்திய ராணுவத்தின் எல்லை பாதுகாப்புப் படையில் சேர்ந்தவர். தற்போது மத்தியப் பிரதேசத்தின் இந்தூரில் டெமோ இன்ஸ்பெக்டராக பணியாற்றுகிறார்.

நாகராஜ் காளிராஜிடம் விஷயத்தைச் சொல்லி உதவுவது பற்றி பேசியதும், செவ்வாய்க்கிழமை நாகராஜ், காளிராஜ், வாஹிதா மற்றும் அவரது தங்கை ஆகிய நால்வரும் கான்பிரன்ஸ் கால் மூலம் பேசியுள்ளனர். ஆனால், அவர்களுக்குள் பேசிக்கொள்ள மொழி தடையாக இருந்துள்ளது.

தென் ஆப்பிரிக்கா, நைஜிரியா ஆகிய நாடுளிலிருந்து வாஹிதாவின் தங்கை உட்பட எட்டு பெண்கள் நல்ல சம்பளத்தில் வேலை வாங்கித்தருவதாக இந்தியாவுக்குக் கடத்திவரப்பட்டுள்ளனர். டெல்லிக்கு வந்தது அவர்களை பாலியல் தொழிலில் ஈடுபட வற்புறுத்தியுள்ளனர். மற்ற பெண்கள் அதற்கு ஒத்துக்கொண்டதாகவும் வாஹிதாவின் தங்கை தன்னை மீண்டும் தாய்நாட்டுக்கு அனுப்பிவிடுமாறு கேட்டதாகவும் காளிராஜ் கூறுகிறார். ஆனால் அவர்களை அழைத்து வந்த இடைத்தரகர்கள் அந்தச் சிறுமியின் பாஸ்போர்ட் உள்ளிட்டவற்றை பறிமுதல் செய்துவைத்திருந்தனர். இந்தியாவுக்கு அழைத்து வருவதற்கு தாங்கள் செலவு செய்த பணத்தை திரும்பக்கொடுத்தால் அவற்றைத் தருவதாகக் கூறியுள்ளனர். சிறுமியுடன் இருந்த மற்ற பெண்களும் இடைத்தரகர்கள் சொல்வதைக் கேட்டு பாலியல் தொழிலைச் செய்ய ஒப்புக்கொள்ளுமாறு அந்தச் சிறுமியை கட்டாயப்படுத்தியிருக்கிறார்கள்.

இந்நிலையில்தான் அந்தச் சிறுமிக்கு உதவ நாகராஜும் காளிராஜும் முன்வந்துள்ளனர். கான்பிரன்ஸ் காலில் பேசுவது சரிவராத நிலையில் காளிராஜ் தமிழிலிருந்து ஆங்கிலத்துக்கு மொழிபெயர்ப்பு செய்யும் மொபைல் ஆப் உதவியுடன் டெல்லியில் இருக்கும் சிறுமியுடன் எஸ்எம்எஸ் மூலம் பேசியுள்ளார். தான் தமிழில் சொல்ல விரும்புவதை ஆப் மூலம் மொழிபெயர்த்து அதை அந்தச் சிறுமிக்கு அனுப்பியுள்ளார்.

இவ்வாறு அந்தச் சிறுமி டெல்லியில் மாளவியா நகர் எக்ஸ்டென்ஷன் என்ற பகுதியில் இருப்பதை அறிந்துள்ளார் காளிராஜ். உடனே அந்தப் பெண்ணை மீட்குமாறு மாளவியா நகர் காவல் நிலையத்திற்கு செவ்வாய்க்கிழமை காலை தகவல் தெரிவித்துள்ளார். ஆனால் அந்தக் காவல் நிலையத்தினர் அப்படி எந்த வழக்கும் இல்லை என பதிலளித்துள்ளனர். பின், நாகராஜ் 110011 என்ற எண்ணில் காவல்துறை கட்டுப்பாட்டு அறையை தொடர்புகொண்டு சிறுமியை மீட்பது பற்றி தெரிவித்திருக்கிறார்.

அதன்பின் 18 பேர் கொண்டு போலீஸ் குழு சிறுமி இருக்கும் இடத்துக்குச் சென்று, அந்தச் சிறுமி மட்டும் மீட்கப்பட்டுள்ளார். சிறுமியை போலீசார் வெளியுறவத்துறை வசம் ஒப்படைத்துள்ளனர். சிறுமியை மீட்கும் நடவடிக்கையில் போலீசார் தங்களது அடுத்தடுத்த நகர்வுகளை தன்னுடன் பகிர்ந்துகொண்டனர் எனவும் தற்போது அந்தச் சிறுமியுடன் இருந்தவர்களையும் தொடர்புகளை முயல்வதாகவும் நாகராஜ் கூறுகிறார்.

மீட்கப்பட்ட சிறுமியை தென் ஆப்பிரிக்கா அனுப்ப ஏற்பாடு செய்யப்பட்டு வருகிறது. இன்னும் இரண்டு வாரங்களில் அவர் அனுப்பி வைக்கப்படுவார் எனத் தெரிகிறது.