வே லூர் அருகே ஜலகாம்பாறை கிராமத்தில் உள்ள பிரசித்தி பெற்ற முருகன் ஆலயத்தில் மர்ம நபர்கள் உள்ளே புகுந்து உண்டியலை கொள்ளையடித்த சம்பவம் அரங்கேறியுள்ளது. 
வேலூர் மாவட்டம் திருப்பத்தூர் அடுத்த ஜலகாம்பாறை கிராமத்தில் மிகவும் பிரசித்தி பெற்ற முருகன் ஆலயம் உள்ளது. இந்த கோயில் பிரகார அருகாமையில் திருப்பதி பெருமாள் கோயில் மற்றும் விக்ன விநாயகர் ஆலயம் உள்ளது. இந்த ஆலயத்தின் அருகாமையில் உள்ள நீர்வீழ்ச்சி, பிரபல சுற்றுலா தளமாக விளங்குகிறது. இந்த நீர்வீழ்ச்சிக்கு பல மாநிலங்களில் இருந்தும் சுற்றுலாவாசிகளும் மற்றும் பக்தர்களும் வந்து செல்கின்றனர். 

இந்த கோயிலுக்கு வரும் பக்தர்கள் நேர்த்திக்கடனுக்காக அளிக்கும் காணிக்கைகளை உண்டியலில் செலுத்தி விட்டு செல்கின்றனர். இந்த உண்டியல் எட்டு மாத காலமாக திறக்காமல் அப்படியே உள்ளது. வருகின்ற ஆடி மாதம் கோயில் திருப்பணிக்காக எடுத்து செலவிட கோயில் நிர்வாகத்தினர் முடிவு செய்திருந்தனர். 

இந்நிலையில் நேற்று முன்தினம் இரவோடு இரவாக மர்ம நபர்கள் கோவிலின் பூட்டை உடைத்து உள்ளே புகுந்து உண்டியலில் பூட்டை உடைத்து அதில் இருந்த பணம் மற்றும் பக்தர்கள் நேர்த்திக்கடனாகச் செலுத்திய தாலி உள்பட அனைத்தையும் கொள்ளையடித்து சென்றனர். இதேபோல் அருகில் இருந்த மற்ற கோயில்களின் உண்டியல் பூட்டையும் உடைத்து அதிலிருந்த பணம், நகை உள்ளிட்டவற்றை கொள்ளைடித்து விட்டு தப்பி சென்றனர். இது தொடர்பாக காவல்துறையினர் வழக்கு பதிவு செய்து, கொள்ளையடித்து சென்ற மர்ம நபர்களை தேடி வருகின்றனர். 

இதுகுறித்து அப்பகுதி மக்கள் கூறுகையில், இரவு நேரத்தில் ரோந்து பணியில் வரும் காவலர்கள் இப்பகுதிக்கு வருவதில்லை. வந்திருந்தால் இந்த திருட்டை தடுத்திருக்க முடியும். எனவே இரவு நேரத்தில் ரோந்து பணியில் ஈடுபடும் காவலர்கள் அப்பகுதிக்கு வந்து சென்றால் நன்றாக இருக்கும் என்று அப்பகுதிவாசிகள் கோரிக்கை வைத்துள்ளனர்.